Rekipere PIN pwoteksyon idantite ou (IP PIN)

Si yo te ba w yon PIN pwoteksyon idantite (IP PIN) epi w te pèdi li oswa ou pa t resevwa yon Avi CP01A (an anglè), w ap bezwen rekipere IP PIN ou an sou Entènèt oswa mande pou n ba w li ankò pou w evite reta nan pwosesis la.

Si ou ranpli deklarasyon ou san IP PIN ou an

• Nou pral rejte deklarasyon elektwonik ou a.
• Nou pral gade papye w la pou verifye idantite w, sa pral retade ranbousman w lan.

Yo te ba w yon IP PIN si

• Ou se yon viktim vòl idantite.
• Ou te chwazi resevwa yon IP PIN.

Kòman pou w rekipere IP PIN ou sou entènèt

• Ou ka sèvi ak kont sou entènèt ou a pou rekipere IP PIN aktyèl ou a. IP PIN ou an disponib nan paj “Pwofil” ou a. Si w pa genyen yon kont sou IRS.gov, y ap mande w pou w kreye yon kont epi valide idantite w.

Remak: Yon IP PIN pou depandan ki minè pa ka rekipere sou entènèt. Pou rekipere yon IP PIN pou depandan minè rele 800-908-4490.

Kòman yo ka bay ou IP PIN ou an ankò

• Ozetazini rele 800-908-4490, Lendi-Vandredi, 7 am jiska 7 pm lè lokal (Alaska ak Hawaii swiv Lè Pasifik la).
• Itilizatè entènasyonal yo rele 267-941-1000 (pa nimewo gratis la) ant 6 am ak 11 pm ET.

Remak: Si w kapab verifye idantite w ak yon asistan nan telefòn, y ap voye IP PIN ou a pa lapòs nan 21 jou nan adrès ki nan dosye IRS la.

IP PIN ou a pa kapab vini ankò pa lapòs si

• Ou te patisipe nan pwogram IP PIN sou entènèt apre 2019.
• Se apre 14 oktòb epi ou poko ranpli Fòm 1040 oswa 1040-SS ou kounye a oswa ane avan yo.

Si IP PIN ou a pa ka bay ankò epi ou pa ka kreye oswa jwenn aksè nan yon kont sou entènèt, poste yon deklarasyon enpo sou papye san IP PIN ou. Nou pral gade deklarasyon ou a pou konfime ke ou te ranpli li, men sa ka retade ranbousman ou an.

Pa ranpli Fòm 15227 si yo deja ba w yon IP PIN. Fòm sa a se sèlman pou nouvo demann pou patisipe nan pwogram IP PIN la.